2015-09-02 rfa
កម្លាំងនគរបាលខេត្តកោះកុង បានឃាត់ខ្លួនមន្ត្រីសង្គមស៊ីវិល អ្នកកាសែត សកម្មជនការពារបរិស្ថាន និងតំណាងសហគមន៍ សរុបជិត ២០នាក់ ដើម្បីសួរចម្លើយនៅស្នងការដ្ឋាននគរបាលខេត្តនេះ ខណៈពេលពួកគាត់ចុះឃ្លាំមើលសកម្មភាពតវ៉ារបស់ប្រជាពលរដ្ឋមានទំនាស់ដីធ្លី និងសកម្មជនការពារបរិស្ថាននៅមុខសាលាដំបូងខេត្តកោះកុង នៅព្រឹកថ្ងៃពុធ ទី២ ខែកញ្ញា។
មន្ត្រីនគរបាលឲ្យដឹងថា ការឃាត់ខ្លួននេះ ធ្វើឡើងតាមបញ្ជារបស់តុលាការខេត្តកោះកុង ប៉ុន្តែមន្ត្រីសិទ្ធិមនុស្សបានចាត់ទុកការឃាត់ខ្លួននេះ ធ្វើឡើងខុសច្បាប់ និងរំលោភសិទ្ធិមនុស្សធ្ងន់ធ្ងរ។
មន្ត្រីសម្របសម្រួលនៃសមាគមអាដហុក (ADHOC) ប្រចាំខេត្តកោះកុង លោក ញៀប សំអឿន ស្ថិតក្នុងចំណោមមន្ត្រីសង្គមស៊ីវិល អ្នកកាសែត សកម្មជនបរិស្ថាន និងតំណាងសហគមន៍ទាំង ១៧នាក់ បានចាត់ទុកការចាប់ខ្លួននេះ ថាជាការគំរាមកំហែងដល់សិទ្ធិសម្ដែងមតិរបស់ពលរដ្ឋ និងសកម្មភាពចុះធ្វើការងាររបស់សង្គមស៊ីវិល។ មន្ត្រីសិទ្ធិមនុស្សរូបនេះឲ្យដឹងថា មនុស្សទាំង ១៧នាក់ ដែលត្រូវចាប់ខ្លួន ត្រូវកម្លាំងនគរបាលព្រហ្មទណ្ឌកម្រិតស្រាលខេត្តនេះសួរចម្លើយម្នាក់ម្តងៗ ចំពោះសកម្មភាពការងាររៀងៗខ្លួន។ សមត្ថកិច្ចអះអាងថា ការចាប់ខ្លួននេះបានអនុវត្តតាមនីតិវិធីរបស់តុលាការខេត្តកោះកុង៖ «ព័ត៌មានចុងក្រោយបន្ទាប់ពីព្រះរាជអាជ្ញាតុលាការខេត្តកោះកុង បានពិនិត្យមើលចម្លើយរបស់ប៉ូលិស ក៏បានចោទពីបទញុះញង់ក្នុងមាត្រា ៤៩៤ និង ៤៩៥ ប៉ុន្តែខាងមន្ត្រីសង្គមស៊ីវិលបដិសេធ ហើយព្រះរាជអាជ្ញាចោទថា ខាងមន្ត្រីសង្គមស៊ីវិលបានឈរនៅក្នុងហ្វូងបាតុករ ប៉ុន្តែធាតុពិតពួកយើងមានវីដេអូ ឬឯកសារបញ្ជាក់ថា ពួកយើងមិនឈរនៅក្នុងហ្វូងបាតុករទេ គឺគ្រាន់តែនៅឈរក្បែរៗនោះ ដើម្បីថតរូបភាពតែប៉ុណ្ណោះ»។
ចំណែក លោក អ៊ិន គង់ជិត មន្ត្រីសម្របសម្រួលអង្គការលីកាដូ (LICADHO) ខេត្តកោះកុង ក៏ត្រូវសមត្ថកិច្ចចាប់ខ្លួនសួរចម្លើយដូចគ្នាដែរ។ លោកឲ្យដឹងថា នៅព្រឹកថ្ងៃទី២ ខែកញ្ញា មានអ្នកភូមិ ២ក្រុម បានប្រមូលផ្តុំគ្នាតវ៉ាពីមុខតុលាការសាលាដំបូងខេត្តកោះកុង ទាក់ទងករណីទំនាស់ដីធ្លីនៅឃុំជីខក្រោម ស្រុកស្រែអំបិល ជាមួយភាគី លោក ហេង ហ៊ុយ ហើយត្រូវតុលាការខេត្តនេះ កោះហៅពលរដ្ឋ ៦នាក់មកសាកសួរជុំវិញពាក្យបណ្ដឹងរបស់លោក ហេង ហ៊ុយ។ ចំណែកពលរដ្ឋមួយក្រុមទៀត គឺប្រជាពលរដ្ឋមានគ្នាប្រមាណ ១០០នាក់ បានមកធ្វើបាតុកម្មបំបែកការប្រមូលផ្តុំរបស់ពលរដ្ឋមួយក្រុមផ្សេងទៀត ដែលមកប្រមូលផ្តុំគ្នាដើម្បីទាមទារឲ្យតុលាការដោះលែងសកម្មជនការពារបរិស្ថាន ៣នាក់ ពីពន្ធនាគារអស់ពេល ២សប្ដាហ៍មកហើយ។
លោក អ៊ិន គង់ជិត ថ្លែងថា សកម្មភាពរបស់ពលរដ្ឋមានគ្នាប្រមាណ ១០០នាក់ ដែលមកតវ៉ាបំបែកការប្រមូលផ្តុំរបស់សកម្មជនការពារបរិស្ថាន កាលពីព្រឹកថ្ងៃពុធ ទី២ ខែកញ្ញា គឺមិនមានកម្លាំងសមត្ថកិច្ចរារាំងទេ និងបានការសម្រួលចរាចរណ៍ក្នុងការដើរហែក្បួន៖ «ព្រឹកមិញនេះក្រុមពលរដ្ឋដែលមកតវ៉ាឲ្យដោះលែងសមាជិកអង្គការចលនា មាតាធម្មជាតិ ៣នាក់ហ្នឹង គាត់អត់បានលើកបដាតវ៉ានៅមុខតុលាការទេ។ ប៉ុន្តែពលរដ្ឋមានទំនាស់ដីធ្លីមកពីឃុំជីខក្រោមមួយក្រុមផ្សេងទេ ដែលឡើងមកតវ៉ានៅពីមុខតុលាការប្រមាណ ២០នាក់ ដើម្បីស្នើឲ្យតុលាការដោះស្រាយបណ្ដឹង ឬកោះហៅពលរដ្ឋ ៥នាក់មកសាកសួរ ប្ដឹងដោយភាគីលោក ហេង ហ៊ុយ ហើយស្នើឲ្យតុលាការដោះស្រាយទំនាស់ដីធ្លីដោយយុត្តិធម៌»។
មន្ត្រីអង្គការលីកាដូ លោក អ៊ិន គង់ជិត បានចាត់ទុកការចាប់ខ្លួនលោក ឬមន្ត្រីសង្គមស៊ីវិល សកម្មជនការពារបរិស្ថាន អ្នកកាសែត និងតំណាងសហគមន៍ចំនួន ១៧នាក់ ផ្ដើមដោយកម្លាំងនគរបាលខេត្តកោះកុង ថាធ្វើឡើងខុសច្បាប់ និងគំរាមដល់ការចុះបំពេញការងាររបស់សង្គមស៊ីវិល៖«អាជ្ញាធរ បានប្រើកម្លាំងច្រើនហួសហេតុ និងបានប្រើប្រព័ន្ធតុលាការដើម្បីបង្ក្រាបទៅលើកិច្ចការងាររបស់ មន្ត្រីសិទ្ធិមនុស្សដែលកំពុងមានតួនាទីតាមឃ្លាំមើលសកម្មភាពរំលោភ សិទ្ធិមនុស្ស»។
ស្នងការនគរបាលខេត្តកោះកុង លោក សំ ឃិតវៀន មិនធ្វើអត្ថាធិប្បាយជុំវិញការចាប់ខ្លួនមន្ត្រីសង្គមស៊ីវិល ឬតំណាងសហគមន៍ចំនួន ១៧នាក់ទេ ដោយលោកជាប់រវល់ប្រជុំ។ គិតមកដល់ម៉ោងជិត ៥ល្ងាច ថ្ងៃពុធ ទី២ ខែកញ្ញា សមត្ថកិច្ចនគរបាលខេត្តកោះកុង មិនទាន់ដោះលែងមន្ត្រីសង្គមស៊ីវិល ឬមនុស្សទាំង ១៧នាក់ ដែលត្រូវឃាត់ខ្លួនឲ្យមានសេរីភាពវិញនៅឡើយទេ។
មន្ត្រីសង្គមស៊ីវិលដែលសមត្ថកិច្ចឃាត់ខ្លួនមានដូចជា ប្រធាន និងបុគ្គលិកអង្គការលីកាដូ ប្រចាំការិយាល័យខេត្តកោះកុង ចំនួន ៤នាក់ ប្រធានសមាគមអាដហុក ប្រចាំខេត្តកោះកុង មន្ត្រីអង្គការមជ្ឈមណ្ឌលអប់រំច្បាប់សម្រាប់សហគមន៍ សកម្មជនអង្គការ
ចលនាមាតាធម្មជាតិ និងអ្នកកាសែតខ្មែរប៉ុស្តិ៍ជាដើម។
ទាក់ទងបញ្ហានេះ លោក ផៃធូន ផ្លាមកេសន អភិបាលស្ដីទីខេត្តកោះកុង បានប្រាប់ប្រព័ន្ធផ្សព្វផ្សាយថា ការដែលសមត្ថកិច្ចបំបែកការប្រមូលផ្តុំពលរដ្ឋដែលមកស្នាក់នៅតវ៉ាក្នុងបរិវេណវេទិកាបាល់ទាត់មុខសាលាដំបូងខេត្តកោះកុង ដោយសារពលរដ្ឋទាំងនោះបានបំពានសេចក្ដីជូនដំណឹងរបស់អាជ្ញាធរ ហើយបានធ្វើសកម្មភាពនាំឲ្យប៉ះពាល់សណ្ដាប់ធ្នាប់សាធារណៈ ប៉ះពាល់ដល់ភ្ញៀវទេសចរ ឬការលក់ដូររបស់ក្រុមអាជីវករជាដើម។ ចំណែកឯការឃាត់ខ្លួនមន្ត្រីឃ្លាំមើលសិទ្ធិមនុស្ស សកម្មជនអង្គការផ្សេងៗ និងអ្នកកាសែតជាដើមនោះ គឺមិនជាប់ពាក់ព័ន្ធចំណាត់ការរបស់អាជ្ញាធរខេត្តទេ ប៉ុន្តែសមត្ថកិច្ចអនុវត្តទៅតាមនីតិវិធីរបស់តុលាការខេត្តកោះកុង ប៉ុណ្ណោះ។
ព័ត៌មានបន្ថែម
មន្ត្រីសង្គមស៊ីវិលអង្គការ លីកាដូ និងសមាគមអាដហុក ប្រចាំខេត្តកោះកុង បានឲ្យដឹងថា មនុស្សទាំង ១៧នាក់ ដែលអាជ្ញាធរចាប់ខ្លួន ត្រូវបានដោះលែងវិញនៅម៉ោងជាង ៦ល្ងាច ថ្ងៃពុធ ទី២ ខែកញ្ញា បន្ទាប់បានធ្វើកិច្ចសន្យាបញ្ឈប់សកម្មភាពតវ៉ា និងត្រូវរាយការណ៍ពីសកម្មភាពការងាររៀងៗខ្លួនទៅអាជ្ញាធរនៅពេលចុះ បំពេញការងារនៅថ្ងៃក្រោយ។ ជាងនេះ តុលាការខេត្តកោះកុង ក៏បានតម្រូវ ឬស្នើដល់មន្ត្រីអង្គការសង្គមស៊ីវិល ត្រូវអនុវត្តការងាររបស់ខ្លួនឲ្យស្របតាមតួនាទីជាដើម៕
No comments:
Post a Comment