2015-07-27 rfa
 |
| កម្មការិនីរោងចក្រស្បែកជើងកៅវ៉េ ៣នាក់ (Kaoway) ដែលរងគ្រោះដោយគ្រាប់កាំភ្លើងរបស់ លោក ឈូក បណ្ឌិត ផ្តល់បទសម្ភាសន៍ដល់សារព័ត៌មាននៅខាងមុខរដ្ឋសភា នៅថ្ងៃទី២៧ ខែកក្កដា ឆ្នាំ២០១៥។
RFA/Tha Kitya
|
កម្មការិនី ៣នាក់ដែលរងគ្រោះដោយគ្រាប់កាំភ្លើងរបស់ លោក ឈូក បណ្ឌិត អតីតអភិបាលក្រុងបាវិត កាលពីឆ្នាំ២០១២ ស្នើរដ្ឋសភា ជួយជំរុញរដ្ឋាភិបាល និងរដ្ឋមន្ត្រីក្រសួងមហាផ្ទៃ ឲ្យចេញបទបញ្ជាអន្តរាគមន៍តាមចាប់ខ្លួន លោក ឈូក បណ្ឌិត ផ្ដន្ទាទោសតាមច្បាប់ដូចករណីអតីតពិធីការនីទូរទស្សន៍ ស៊ី.ធី.អិន (CTN) កញ្ញា សាសា ដែរ។
ការដែលកម្មការិនីរោងចក្រស្បែកជើងកៅវ៉េ ៣រូប (Kaoway) ចាកចេញពីខេត្តស្វាយរៀង ឡើងមកទាមទារយុត្តិធម៌ជាថ្មីនៅភ្នំពេញនេះ គឺរយៈពេលជិត ៤ឆ្នាំមកហើយ ពួកគាត់មិនទាន់ទទួលយុត្តិធម៌នៅឡើយ ខុសពីអតីតពិធីការនីទូរទស្សន៍ ស៊ី.ធី.អិន កញ្ញា សាសា ដែលទទួលបានយុត្តិធម៌ក្នុងរយៈពេលជាងមួយសប្ដាហ៍ប៉ុណ្ណោះ ក្រោយពីលោកនាយករដ្ឋមន្ត្រី ហ៊ុន សែន និងលោក ស ខេង រដ្ឋមន្ត្រីក្រសួងមហាផ្ទៃ បានចេញមុខប្រកាសដាក់បទបញ្ជាដាច់ណាត់ ឲ្យតាមចាប់ខ្លួនលោកឧកញ៉ា សុខ ប៊ុន ផ្ដន្ទាទោសតាមច្បាប់ភ្លាមៗនោះ។
រៀបរាប់ទាំងទឹកភ្នែកប្រាប់អ្នកសារព័ត៌មាននៅខាងមុខរដ្ឋសភា នៅថ្ងៃទី២៧ ខែកក្កដា បន្ទាប់ពីដាក់ញត្តិជូនគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា ឬហៅថា គណៈកម្មការទី១ នៃរដ្ឋសភានោះ កម្មការិនីរងគ្រោះ នុត សាខន និយាយថា មុខរបួសពួកគាត់នៅមិនទាន់ជាសះស្បើយពេញលេញនៅឡើយ។ គោលបំណងនៃការឡើងមកដាក់ញត្តិនេះ គឺស្នើឲ្យរដ្ឋសភា ជួយជំរុញទៅរដ្ឋាភិបាលលោកនាយករដ្ឋមន្ត្រី ហ៊ុន សែន និងលោក ស ខេង រដ្ឋមន្ត្រីក្រសួងមហាផ្ទៃ ចេញបទបញ្ជាអន្តរាគមន៍តាមចាប់ខ្លួន លោក ឈូក បណ្ឌិត អតីតអភិបាលក្រុងបាវិត ដែលបានលើកកាំភ្លើងបាញ់រះលើពួកគាត់ កាលពីថ្ងៃទី២០ ខែកុម្ភៈ ឆ្នាំ២០១២ នោះ ផ្ដន្ទាទោសតាមច្បាប់៖ «មុខរបួសនៅមិនទាន់ជាទេ សូម្បីតែធ្វើការរាល់ថ្ងៃមិនដែលពេញម៉ោងផង ធ្វើការពេលណាឈឺឈប់។ ប៉ុណ្ណឹងហើយនៅតែសម្ដេច ហ៊ុន សែន មិនជួយស្រែកទៀត។ អ៊ីចឹងពួកខ្ញុំទាមទារឲ្យសម្ដេច ហ៊ុន សែន ស្រែកដូច កញ្ញា សាសា ដែរ»។
កម្មការិនីរងគ្រោះពីររូបទៀត គឺ ប៊ុន ចិន្តា និង កែវ នា ក៏មានអារម្មណ៍ឈឺចាប់ និងតូចចិត្តមិនខុសគ្នាប៉ុន្មានឡើយ។
យ៉ាងណាក៏ដោយ ក្រោយទទួលបានញត្តិហើយនោះ ប្រធានគណៈកម្មការទី១ នៃរដ្ឋសភា លោក អេង ឆៃអ៊ាង មានប្រសាសន៍ថា លោកកំពុងពិនិត្យលើសំណើនេះ។ លោកបញ្ជាក់ដែរថា ទោះបីជាតុលាការបានផ្ដន្ទាទោស លោក ឈូក បណ្ឌិត ដោយកំបាំងមុខដាក់ពន្ធនាគារ ១៨ខែក៏ដោយ ក៏ប៉ុន្តែមកទល់ពេលនេះ សមត្ថកិច្ចហាក់មិនខ្នះខ្នែងស្វែងរកចាប់ខ្លួន លោក ឈូក បណ្ឌិត ដើម្បីអនុវត្តច្បាប់ឡើយ៖ «ក្នុងករណីនេះ រដ្ឋសភានឹងសរសេរសំណើទៅកាន់សមត្ថកិច្ច ដើម្បីជំរុញឲ្យមានការអនុវត្តឲ្យបានត្រឹមត្រូវ»។
កម្មការិនីរងគ្រោះទាំងបីរូប រៀបរាប់ទាំងហួសចិត្តថា ករណីរបស់ពួកគាត់ គឺធ្ងន់ធ្ងរជាង កញ្ញា សាសា ព្រោះ កញ្ញា សាសា រងគ្រោះត្រឹមតែទះទាត់ប៉ុណ្ណោះ ដោយមិនប្រើកាំភ្លើងឡើយ ប៉ុន្តែករណីពួកគាត់ ប្រឈមមុខបាត់បង់ជីវិតដោយសារបាញ់រះដោយគ្រាប់កាំភ្លើង លោក ឈូក បណ្ឌិត។ តែយ៉ាងនេះក្តី សំណុំរឿងរបស់ កញ្ញា សាសា ត្រូវបញ្ចប់ក្នុងរយៈពេលដ៏ខ្លីប៉ុណ្ណោះ ដោយមានការអន្តរាគមន៍ពីលោកនាយករដ្ឋមន្ត្រី ហ៊ុន សែន និងលោក ស ខេង។ ដោយឡែកករណីពួកគាត់ជិត ៤ឆ្នាំទៅហើយ នៅតែគ្មានពន្លឺយុត្តិធម៌នៅឡើយ។
ឆ្លើយតបចំពោះបញ្ហានេះដែរ អ្នកនាំពាក្យក្រសួងមហាផ្ទៃ លោក ខៀវ សុភ័គ បញ្ជាក់ថា រដ្ឋាភិបាលមិនបានបំភ្លេចចោលករណីនេះទេ គឺនៅតែស្វែងរកចាប់ខ្លួន លោក ឈូក បណ្ឌិត ដដែល ហើយអំពាវនាវឲ្យសាធារណជនជួយសហការផ្តល់ព័ត៌មានភ្លាម បើប្រទះឃើញ លោក ឈូក បណ្ឌិត នៅទីណានោះ៖ «យើងនៅតែរក្សាជំហរចាប់ជនល្មើសហ្នឹងឲ្យបាន ប៉ុន្តែវាមិនដឹងនៅឯណា? យ៉ាងណា យើងគាំទ្រចំពោះពាក្យបណ្ដឹងនេះ»។
កម្មការិនីរងគ្រោះ និងអង្គការសង្គមស៊ីវិល កត់សម្គាល់ថា នៅពេលមានការស្រែកអន្តរាគមន៍ពីលោកនាយករដ្ឋមន្ត្រី ហ៊ុន សែន នោះ គឺចំណាត់ការទាំងអស់តែងតែមានប្រសិទ្ធភាព ដូចជាករណីអតីតពិធីការនីទូរទស្សន៍ ស៊ី.ធី.អិន កញ្ញា សាសា និងករណីលោកឧកញ៉ា ថោង សារ៉ាត់ ជាឧទាហរណ៍ស្រាប់។
មន្ត្រីកម្មវិធីសិទ្ធិការងារនៅមជ្ឈមណ្ឌលអប់រំច្បាប់សម្រាប់សហគមន៍ អ្នកស្រី ឆន សុខា ដែលតាមដានករណីនេះ សម្ដែងការសោកស្ដាយចំពោះចំណាត់ការរបស់សមត្ថកិច្ច និងហៅថាជាចំណាត់ការខ្យល់ ព្រោះគ្មានប្រសិទ្ធភាពក្នុងការនាំខ្លួនជនដៃដល់ ឈូក បណ្ឌិត ផ្ដន្ទាទោសបានឡើយ។
ករណី លោក ឈូក បណ្ឌិត និងលោកឧកញ៉ា សុខ ប៊ុន នេះដែរ ក៏មានការប្រតិកម្មតាមបណ្ដាញសង្គមហ្វេសប៊ុក (facebook) ព្រោងព្រាតផងដែរ ដែលថាករណីស្រដៀងគ្នា តែចំណាត់ការខុសគ្នា ជាពិសេស គឺរិះគន់លើចំណុចខ្លះនៃចំណាត់ការរបស់តុលាការ ក៏ដូចជារដ្ឋាភិបាលកម្ពុជា ថាមិនទាន់មានតម្លាភាព មិនម៉ឺងម៉ាត់ និងមិនទាន់មានភាពស្មោះត្រង់នៅឡើយ៕
No comments:
Post a Comment