ដោយ៖ ពៅ មេត្តា | ថ្ងៃពុធ ទី22 កក្កដា 2015,
ស្តាប់សំឡេង៖ | ចម្លងទុក |
លោកនាយករដ្ឋមន្ត្រី ហ៊ុន សែន(ឆ្វេង) និងលោក សម រង្ស៊ី ប្រធានគណបក្សសង្គ្រោះជាតិ
ថ្ងៃទី២២ ខែកក្កដា ឆ្នាំ២០១៥ គឺខួប១ឆ្នាំ នៃកិច្ចព្រមព្រៀងនយោបាយរវាងគណបក្សប្រជាជនកម្ពុជានិងគណបក្សសង្គ្រោះជាតិជាគណបក្សដែលទទួលអាសនៈនៅក្នុងសភាក្នុងអាណត្តិទី៥។
កិច្ចព្រមព្រៀងនយោបាយ២២កក្កដា គឺជាថ្ងៃបិទបញ្ចប់ភាពជាប់គាំងនយោបាយ នៅដើមអាណត្តិទី៥រយៈពេល១ឆ្នាំ។
កិច្ចព្រមព្រៀងនោះក៏ផ្តល់ឲ្យគណបក្សសង្គ្រោះជាតិទទួលបានអាជ្ញាប័ណ្ណទូរទស្សន៍មួយពីក្រសួងព័ត៌មាននិងការដោះលែងតំណាងរាស្ត្រ៧រូប ដែលរងការចោទប្រកាន់ពាក់ព័ន្ធនឹងហិង្សានៅទីលានប្រជាធិបតេយ្យ។
រយៈពេល១ឆ្នាំនៃកិច្ចព្រមព្រៀងនយោបាយនេះ អ្នកវិភាគមួយចំនួនមើលឃើញលទ្ធផលថា បានធ្វើឲ្យស្ថានភាពនយោបាយបានធូរស្រាល បំពេញឲ្យសភាស្របច្បាប់ ការកែមទ្រង់គណៈកម្មាធិការជាតិរៀបចំការបោះឆ្នោត(គ. ជ. ប)ជាដើម។
ចំណែកថ្នាក់ដឹកនាំគណបក្សសង្គ្រោះជាតិធ្លាប់អះអាងថាកិច្ចព្រមព្រៀង២២កក្កដា ឈានដល់វប្បធម៌សន្ទនារបស់មេដឹកនាំគណបក្សទាំងពីរ ដែលឈានដល់ការដោះស្រាយបញ្ហាអន្តោប្រវេសន៍ បញ្ហាព្រំដែននិងប្រាក់ខែកម្មករជាដើម។
ទោះយ៉ាងណាក៏មានការលើកឡើងថាទំនាក់ទងផ្អែមល្ហែមរបស់មេដឹកនាំគណបក្សទាំងពីរគឺធ្វើឡើងដោយសារភាពទាល់ច្រក ភាពមិនស្មោះត្រង់ ទើបនាំឲ្យបញ្ហាសង្គមជាច្រើនមិនអាចដោះស្រាយបាន។ ភាពទាល់ច្រករបស់គណបក្សប្រជាជនកម្ពុជាគឺត្រូវការតំណាងរាស្ត្រ៥៥រូបរបស់គណបក្សសង្គ្រោះជាតិចូលសភា ដើម្បីបំពេញភាពស្របច្បាប់របស់សភានិងរដ្ឋាភិបាល។ ចំណែកភាពទាល់ច្រករបស់គណបក្សសង្គ្រោះជាតិគឺការដឹកនាំបាតុកម្មជាតិ១ឆ្នាំមិនអាចទទួលបបានលទ្ធផលដូចការរំពឹងទុកគឺការទាមទាររាប់សន្លឹកឆ្នោតឡើងវិញ ការទាមទារឲ្យបោះឆ្នោតឡើងវិញ ឬទាមទារឲ្យលោកនាយករដ្ឋមន្ត្រី ហ៊ុន សែន ចុះចេញពីតំណែងជាដើម។
បទវិភាគផ្សេងទៀត
អ្នកវិភាគបញ្ហាសង្គម លោក អ៊ូ វីរៈ លើកឡើងថា កិច្ចព្រមព្រៀង២២កក្កដាទទួលបានផលតិចតួច ដោយសារភាគីទាំងពីរមិនមានភាពស្មោះត្រង់ដាក់គ្នា។
ក្នុងរយៈពេល១ឆ្នាំកន្លងទៅនេះ លោកនាយករដ្ឋមន្ត្រី ហ៊ុន សែន បានព្រមានជាបន្តបន្ទាប់លើគណបក្សសង្គ្រោះជាតិដូចជាការព្រមានដកតំណែងលោក កឹម សុខា ចេញពីអនុប្រធានទី១នៃរដ្ឋសភា ការព្រមានចាត់ការលើតំណាងរាស្ត្រគណបក្សសង្គ្រោះជាតិផ្សេងៗតាមផ្លូវច្បាប់ជាដើម ដោយចោទថាអ្នកទាំងនោះមិនគោរពកិច្ចព្រមព្រៀងនយោបាយ២២កក្កដា។
នៅប៉ុន្មានថ្ងៃចុងក្រោយជាបន្តបន្ទាប់ លោកនាយករដ្ឋមន្ត្រីបញ្ចេញសារព្រមានដល់គណបក្សសង្គ្រោះជាតិជាថ្មីទៀត ពាក់ព័ន្ធរឿងបញ្ហាព្រំដែនកម្ពុជានិងវៀតណាម។ លោកនាយករដ្ឋមន្ត្រីចោទតំណាងរាស្ត្រគណបក្សសង្គ្រោះជាតិថាបង្កបញ្ហាតាមព្រំដែនធ្វើឲ្យខាតផលប្រយោជន៍ជាតិ។
ក្រោយការព្រមានរបស់លោកនាយករដ្ឋមន្ត្រី ហ៊ុន សែន តែប៉ុន្មានថ្ងៃក្រោយមកតុលាការបានចាប់ផ្តើមចោទប្រកាន់មន្ត្រីគណបក្សសង្គ្រោះជាតិ១១រូប ដោយផ្តន្ទាទោសឲ្យជាប់ពន្ធនាគារចន្លោះពី៧ទៅ២០ឆ្នាំ ពាក់ព័ន្ធហិង្សានៅទីលានប្រជាធិបតេយ្យកាលពីថ្ងៃទី១៥ ខែកក្កដា ឆ្នាំ២០១៤។
ជាការរំឭកខួបមួយឆ្នាំនៃកិច្ចព្រមព្រៀងនយោបាយនេះ មានការចាប់ខ្លួនមន្ត្រីគណបក្សសង្គ្រោះជាតិ១១នាក់ឡើងវិញ នៅថ្ងៃទី២១ខែកក្កដានេះ។ បើរំឭកកាលពីព្រឹកថ្ងៃទី២២ ខែកក្កដា ឆ្នាំ២០១៤ គឺតំណាងរាស្ត្រ៧រូបរបស់គណបក្សសង្គ្រោះជាតិស្ថិតនៅក្នុងពន្ធនាគារព្រៃសនៅឡើយ លុះដល់ពេលល្ងាចថ្ងៃដដែលក្រោយកិច្ចព្រមព្រៀងគណបក្សទាំងពីរទើបតំណាងរាស្ត្រទាំង៧រូបនោះត្រូវដោះលែង។
បើទោះជាលោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់គណបក្សប្រជាជនកម្ពុជាផ្សេងទៀតអះអាងជាញឹកញាប់ថាតុលាការឯករាជ្យមិនស្ថិតនៅក្រោមឥទ្ធិពលរបស់ខ្លួនក៏ដោយ ក៏អ្នកវិភាគមួយចំនួនលើកឡើងថា ចំណាត់ការផ្លូវច្បាប់លើមន្ត្រីបក្សប្រឆាំងជាថ្មីទៀតនេះគឺរងឥទ្ធិពលពីគណបក្សប្រជាជនកម្ពុជា ដោយសារតំណាងរាស្ត្រគណបក្សសង្គ្រោះជាតិធ្វើសកម្មភាពតវ៉ាខ្លាំងរឿងបញ្ហាព្រំដែន។
សកម្មភាពពេលឡើងកម្តៅនយោបាយ តុលាការចាត់ការលើមន្ត្រីបក្សប្រឆាំង ក្រោយមកចរចាទម្លាក់ការចោទប្រកាន់នោះមិនមែនជារឿងថ្មីចម្លែកទេ គឺលោក សម រង្ស៊ី ប្រធានគណបក្សសង្គ្រោះជាតិបច្ចុប្បន្នក៏រងការចោទប្រកាន់ពីតុលាការជាបន្តបន្ទាប់ដែរ តែលោកមិនដែលជាប់ពន្ធនាគារម្តងឡើយ គឺក្រោយនិរទេសខ្លួនទៅក្រៅប្រទេស បន្ទាប់មកចរចា ហើយក៏ទទួលបានការលើកលែងទោស។
ស្ថាបនិកបណ្តាញសង្គម លោក សាម អ៊ីន មើលឃើញថា លោក សម រង្ស៊ី និងលោក ហ៊ុន សែន តែងប្រើយុទ្ធសាស្ត្រនយោបាយដដែលរបៀបនេះ។ លោកថា៖ “រឿងនេះដូចជាមិនចំឡែកទេ សម្រាប់ពួកគាត់ទាំងពីរ ល្បែងនយោបាយ ដែលពួកគាត់លេងហ្នឹង ទី១ ម្ខាងចូលចិត្តធ្វើអ្វីដើម្បីតែប្រជាប្រិយភាព ហើយម្ខាងទៀតគាត់ប្រើប្រាស់ប្រព័ន្ធតុលាការដើម្បីសម្លុត គំរាម ដើម្បីដាក់សម្ពាធ។ ដូច្នេះរឿងហ្នឹង វាដូចជាម្ភៃ សាមសិបឆ្នាំនៅតែអ៊ីចឹង” ។
លោក អ៊ូ វីរៈ ហៅឥរិយាបថនយោបាយដដែលនេះ ជាកត្តាធ្វើសង្គមជួបភាពស្មុគស្មាញមិនអាចទទួលបានការរីកចម្រើន។ លោកបញ្ជាក់ថា៖ “ស្ថានភាពនយោបាយអត់ទៅមុខ គឺសង្គមមិនអាចទៅមុខទេ។ ឥឡូវនេះឧទាហរណ៍ថា វប្បធម៌សន្ទនា មានបានចរចា និងជជែកគ្នារឿងអយុត្តិធម៌នៅក្នុងដីធ្លី មានបានដោះស្រាយឯណាទាក់ទងរឿងព្រៃឈើ ទាក់ទងរឿងពុករលួយ ទាក់ទងរឿងតុលាការអត់ឯករាជ្យ មានបានសន្ទនាគ្នាឯណា សន្ទនាតែពីរឿងអំណាចគ្នាទៅវិញទៅមក រវាងគណបក្សទាំងពីរហ្នឹង” ។
អ្នកវិភាគលោក អ៊ូ វីរៈ និងលោក សាម អ៊ីន រិះគន់អ្នកនយោបាយខ្មែរធ្វើសកម្មភាពគ្មានភាពស្មោះត្រង់ គឺក្នុងគោលបំណងធ្វើឲ្យគូប្រជែងចុះខ្សោយ ហើយខ្លួនទទួលបានប្រជាប្រិយភាព ខណៈអ្នកនយោបាយនៅប្រទេសជឿនលឿនមានគោលនយោបាយ មានទស្សនវិស័យច្បាស់លាស់ ដើម្បីឲ្យជាតិគេរីកចម្រើន។
អ្នកនយោបាយនៅក្នុងប្រទេសជឿនលឿន គេដាក់គោលនយោបាយ ដើម្បីឲ្យប្រទេសមានឥទ្ធិពលក្នុងតំបន់ ក្នុងពិភពលោក និងពេលខ្លះមានការប្រកួតប្រជែងឥទ្ធិពលនៅលើភពព្រះចន្ទនិងភពផ្សេងៗទៀតផងដែរ។ តែអ្នកនយោបាយខ្មែរ បែរជាអួតអាងពីការប្រើល្បិចបំបែកបំបាក់គូប្រជែង ល្បិចសាមកុក ឬបរិហាររឿងរ៉ាវជាលក្ខណៈបុគ្គល ដើម្បីចំណេញនយោបាយទៅវិញ ខណៈបញ្ហាក្នុងសង្គមរាប់រយជំពូកកំពុងអង្គុយចាំអ្នកមានសមត្ថភាពដោះស្រាយ៕
សូមសរសេរមកលោក ពៅ មេត្តា តាមរយៈ minpov@vodhotnews.com
No comments:
Post a Comment