Posted by DTN7 on May 12, 2015
លោកឧកញ៉ា អ៊ឹង ប៊ុនហ៊ូវ ដែលធ្លាប់មានងារជា "ឯកឧត្តម ឧកញ៉ា" និងគេស្គាល់ថា ជានាយកក្រុមហ៊ុន AZ Distribution Co., Ltd. ជាក្រុមហ៊ុនទទួលបម្រើសេវាយកលុយពីផ្លូវជាតិលេខ៤រយៈពេល៣៥ឆ្នាំនោះ ត្រូវបានបញ្ចប់មុខតំណែងពីទីប្រឹក្សារាជរដ្ឋាភិបាល មានឋានៈស្មើ រដ្ឋមន្ត្រី វិញហើយ ដោយព្រះរាជក្រឹត្យលេខនស/រកត/០៤១៥/៣០០ ចុះថ្ងៃទី០៦ ខែមេសា ឆ្នាំ២០១៥ ។
យោងតាមព្រះរាជក្រឹត្យលេខនស/រកត/០៤១៥/៣០០ ចុះថ្ងៃទី០៦ ខែមេសា ឆ្នាំ២០១៥ ចុះហត្ថលេខាដោយសម្តេចអគ្គមហាធម្មពោធិសាល ជា ស៊ីម ប្រមុខរដ្ឋស្តីទី ក្នុងព្រះបរមនាម និងតាមព្រះរាជត្រាស់បង្គាប់របស់ព្រះករុណាព្រះមហាក្សត្រជាទីសក្ការៈនោះ បានបញ្ជាក់ឲ្យដឹងថា ការបញ្ចប់មុខតំណែងឯកឧត្តម ឧកញ៉ា អ៊ឹង ប៊ុនហ៊ូវ ពីទីប្រឹក្សារាជរដ្ឋាភិបាល មានឋានៈស្មើរដ្ឋមន្ត្រី ពុំទទួលប្រាក់បៀវត្សរ៍ គឺតាមសំណើរបស់សាមីខ្លួន ។
គួរបញ្ជាក់ជូនថា លោក អ៊ឹង ប៊ុនហ៊ូវ នាយកក្រុមហ៊ុន AZ Distribution Co., Ltd. ទទួលបានការតែងតាំងជាឧកញ៉ាដោយព្រះរាជក្រឹត្យលេខនស/រកត/១១៩៦/៨០ ចុះថ្ងៃទី២៦ ខែវិច្ឆិកា ឆ្នាំ១៩៩៦ ។
លោកឧកញ៉ា អ៊ឹង ប៊ុនហ៊ូវ ធ្លាប់បានឈរឈ្មោះជាអ្នកតំណាងរាស្ត្រពេញសិទ្ធិគណបក្សប្រជាជនកម្ពុជាលំដាប់លេខរៀងទី៦ នៅមណ្ឌលខេត្តតាកែវ នាអាណត្តិទី៤(២០០៨-២០១៣) ហើយក៏បានជាប់ឆ្នោតជាអ្នកតំណាងរាស្ត្រ ប៉ុន្តែលោកឧកញ៉ារូបនេះបានដកខ្លួនថយមិនធ្វើជាអ្នកតំណាងរាស្ត្រទេ ហើយត្រូវបានតែងតាំងជារដ្ឋលេខាធិការក្រសួងសាធារណការ និងដឹកជញ្ជូន ដោយព្រះរាជក្រឹត្យលេខនស/រកត/០៩០៨/១០៥៥ ចុះថ្ងៃទី២៥ ខែកញ្ញា ឆ្នាំ២០០៨ ។ លើសពីនេះ ឯកឧត្តម ឧកញ៉ា អ៊ឹង ប៊ុនហ៊ូវ ក៏ធ្លាប់ត្រូវបានតែងតាំងផងដែរជាទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានីតិកាលទី៤នៃរដ្ឋសភា មានឋានៈស្មើរដ្ឋមន្ត្រី បន្ថែមលើមុខងារបច្ចុប្បន្នជារដ្ឋលេខាធិការក្រសួងសាធារណការនិងដឹកជញ្ជូន ដោយព្រះរាជក្រឹត្យលេខនស/រកត/១២០៨/១៣១៤ ចុះថ្ងៃទី០៨ ខែធ្នូ ឆ្នាំ២០០៨ ។ ដោយឡែក ក្នុងការងារកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធានដ៏មានឥទ្ធិពលនោះ លោកឧកញ៉ា អ៊ឹង ប៊ុនហ៊ូវ ធ្លាប់បានទទួលស្គាល់ជាសមាជិកគណៈកម្មាធិការកណ្តាលកាកបាទក្រហមកម្ពុជាអាណត្តិទី៤ ដោយអនុក្រឹត្យរបស់រាជរដ្ឋាភិបាលលេខ៦១៧អនក្រ.តត ចុះថ្ងៃទី០៤ ខែកញ្ញា ឆ្នាំ២០០៦ ។
លុះឈានមកដល់សម័យបោះឆ្នោតជ្រើសតាំងតំណាងរាស្ត្រនីតិកាលទី៥(២០១៣-២០១៨) លោកឧកញ៉ា អ៊ឹង ប៊ុនហ៊ូវ ត្រូវបានគណបក្សប្រជាជនកម្ពុជាសម្រេចឲ្យឈរឈ្មោះជាបេក្ខជនតំណាងរាស្ត្របម្រុងលំដាប់លេខរៀងទី២ នៅមណ្ឌលខេត្តកំពង់ឆ្នាំងវិញ ហើយលោកឧកញ៉ារូបនេះមិនបានជាប់ឆ្នោតជាអ្នកតំណាងរាស្ត្រទេ ដ្បិតនៅមណ្ឌលខេត្តកំពង់ឆ្នាំង គណបក្សប្រជាជនកម្ពុជាទទួលបានសំឡេងឆ្នោតគាំទ្រត្រឹម២អាសនៈប៉ុណ្ណោះ ក្នុងចំណោមអាសនៈសរុបចំនួន៤អាសនៈ ។ លទ្ធផលដូច្នេះ ធ្វើឲ្យលោកឧកញ៉ា អ៊ឹង ប៊ុនហ៊ូវ បាត់ឈ្មោះពីក្នុងពិភពនយោបាយផង និងបាត់ឈ្មោះពីក្នុងស្ថាប័នកាកបាទក្រហមកម្ពុជាផងនៅអាណត្តិទី៥ ។
ក្រោយពីមានការចុះផ្សាយរំលឹករបស់គេហទំព័រសារព័ត៌មាន ដើមត្នោត នាថ្ងៃទី២៧ ខែតុលា ឆ្នាំ២០១៣ និយាយអំពីការបាត់ឈ្មោះលោកឧកញ៉ា អ៊ឹង ប៊ុនហ៊ូវ ពីពិភពនយោបាយគណបក្សកាន់អំណាចនៅអាណត្តិទី៥រួចមក ទើបលោកឧកញ៉ា អ៊ឹង ប៊ុនហ៊ូវ ក៏ត្រូវបានតែងតាំងជាទីប្រឹក្សារាជរដ្ឋាភិបាលកម្ពុជាអាណត្តិទី៥ មានឋានៈស្មើរដ្ឋមន្ត្រី ពុំទទួលប្រាក់បៀវត្សរ៍ ដោយព្រះរាជក្រឹត្យលេខនស/រកត/១១១៣/១២៣៣ ចុះថ្ងៃទី១១ ខែវិច្ឆិកា ឆ្នាំ២០១៣ ពោលគឺទទួលបានងារជា "ឯកឧត្តម ឧកញ៉ា" ឡើងវិញ ។
ដោយមិនអាចដឹងនូវមូលហេតុជាក់លាក់ក្រៅអំពីអះអាងថា តាមសំណើរបស់សាមីខ្លួននោះ ឥឡូវនេះ ឯកឧត្តម ឧកញ៉ា អ៊ឹង ប៊ុនហ៊ូវ ត្រូវបានបញ្ចប់មុខតំណែងពីទីប្រឹក្សារាជរដ្ឋាភិបាលកម្ពុជាវិញហើយៗក៏លែងមានងារជា "ឯកឧត្តម ឧកញ៉ា" ទៀតដែរ ៕
1 comment:
You were once Hun sen's dog. Now you are straying dog, waiting to get done with.
Post a Comment