 |
| កញ្ញា មាស សុខសោភា។ វុទ្ធី |
Fri, 8 May 2015 ppp
ឈឹម ស្រីនាង and ស៊ូ វុទ្ធី
ភ្នំពេញ: បើទោះជាមមាញឹកនឹងកម្មវិធីប្រគំតន្ត្រីនៅតាមបណ្ដាខេត្តក្រុងជាប់គ្នារដឹកសឹងតែលែងស្គាល់ផ្ទះសម្បែងក្ដី ក៏កំពូលតារាចម្រៀង មាស សុខសោភា បានដាក់គម្រោងការចុងសប្ដាហ៍នេះ ដោយនាំយកអំណោយ និងថវិកាទៅជួយជនរងគ្រោះដោយសារការឆ្លងមេរោគអេដស៍ នៅឃុំរកា ស្រុកសង្កែ ខេត្តបាត់ដំបង។
តារាស្រីមានទឹកដមសំនៀងពីរោះ និងល្បីឈ្មោះតាមរយៈសកម្មភាពមនុស្សធម៌ ព្រមទាំងក្លាហានចេញមុខការពារព្រៃឈើធម្មជាតិរហូតដល់មានអ្នកគាំទ្រក្នុងបណ្ដាញសង្គមច្រើនលើសលប់ដល់ជាង ១ លាននាក់នោះ បាននិយាយប្រាប់ ភ្នំពេញ ប៉ុស្ដិ៍ ផ្ទាល់ក្នុងជំនួបកម្មវិធីប្រគំតន្ត្រីចុងសប្ដាហ៍ ថា នៅថ្ងៃសៅរ៍អាទិត្យនេះ កញ្ញានឹងនាំយកអំណោយថវិកាជូនប្រជាជនប្រមាណ ៣០០ នាក់ដែលកំពុងរងទុក្ខវេទនាពីការឆ្លងមេរោគអេដស៍ដោយសារកំហុសគ្រូពេទ្យដែលមិនមានវិជ្ជាជីវៈ នៅឃុំរកា។
កញ្ញា មាស សុខសោភា បាននិយាយថា៖ «នៅចុងសប្ដាហ៍នេះ ពេលខ្ញុំទៅច្រៀងខនសឺតនៅខេត្តប៉ៃលិន ខ្ញុំនឹងឆៀងចូលទៅខេត្តបាត់ដំបងដើម្បីជួបបងប្អូននៅឃុំរកា។ ខ្ញុំទៅទីនោះគឺខ្ញុំចង់លើកទឹកចិត្តដល់ពួកគាត់ដែលឆ្លងមេរោគអេដស៍នោះ កុំឲ្យពួកគាត់បាក់ទឹកចិត្ត គឺត្រូវមានសង្ឃឹមរស់នៅឲ្យដូចគេឯងធម្មតាអ៊ីចឹង»។
ស្ថាបនិកមូលនិធិ «បេះដូង មាស សុខសោភា» ដែលបង្កើតឡើងក្នុងគោលបំណងឧបត្ថម្ភជនរងគ្រោះមហន្តរាយ ជួយប្រជាជនជួបទុក្ខលំបាក រួមចំណែកលើកកម្ពស់ការអប់រំ និងថែរក្សាបរិស្ថានព្រៃឈើធម្មជាតិនោះ បានឲ្យដឹងថា អំណោយ និងថវិកាផ្ដល់ជូនប្រជាជនឆ្លងមេរោគអេដស៍លើកនេះគឺរំលេចចេញពីទឹកចិត្តរបស់សប្បុរសជន រួមទាំងញើសឈាមរបស់រូបនាងផ្ទាល់។
កញ្ញាបានថ្លែងប្រាប់ភ្នំពេញ ប៉ុស្ដិ៍ ទៀតថា៖ «ខ្ញុំនឹងនាំយកថវិកា ព្រមទាំងសម្ភារប្រើប្រាស់តិចតួចទៅជូនប្រជាជនប្រមាណ ៣០០ នាក់នៅឃុំរកា ដោយម្នាក់ទទួលបានថវិកា ៥ ដុល្លារ និងរបស់របរប្រើប្រាស់ខ្លះៗ»។
លោក មាស សុខរតនៈ ដែលជាបងប្រុស និងជាអ្នកនាំពាក្យរបស់កញ្ញា មាស សុខសោភា ក៏បានបញ្ជាក់ផងដែរថា៖ «សោភា នឹងឆ្លៀតទៅចែកអំណោយដល់ប្រជាជនរងគ្រោះឃុំរកានៅថ្ងៃទី ៨ ខែឧសភា នេះហើយ»។
គួររំឭកថា ករណីនៃការរីករាលដាលឆ្លងមេរោគអេដស៍លើមនុស្សជាង ២៣០ នាក់ដ៏គួរឲ្យរន្ធត់នៅឃុំរកា បានផ្ទុះឡើងកាលពីខែធ្នូ ឆ្នាំមុន ដោយជនសង្ស័យជាគ្រូពេទ្យភូមិឈ្មោះ យ៉ែម ជ្រិន ត្រូវបានតុលាការខេត្តបាត់ដំបងសម្រេចឃុំខ្លួនជាមួយការចោទប្រកាន់បីបទល្មើស ដែលអាចផ្តន្ទាទោសដាក់ពន្ធនាគារអស់មួយជីវិត៕
No comments:
Post a Comment