តាមពិតទៅ ឯកឧត្តម ឈាង វុន អាយុ៦៤ឆ្នាំ សមាជិកគណៈកម្មាធិការកណ្តាលគណបក្សប្រជាជនកម្ពុជា ត្រូវដាក់ឲ្យចូលនិវត្តន៍ក្នុងក្របខ័ណ្ឌមន្ត្រីគ្រប់គ្រងរដ្ឋបាលនៅក្រសួងសេដ្ឋកិច្ច និងហិរញ្ញវត្ថុដែលមានឋានន្តរស័ក្តិឧត្តមមន្ត្រីថ្នាក់លេខ៥ ចាប់តាំងពីថ្ងៃទី០១ ខែកុម្ភៈ ឆ្នាំ២០១១ មកម្ល៉េះ ប៉ុន្តែអ្វីដែលបង្កប់នូវមិនប្រក្រតីខ្លាំងនោះ គឺឯកឧត្តមរូបនេះបែរជាមានឱកាសទទួលបានការដំឡើងឋានន្តរស័ក្តិផ្លោះរំលង៤ថ្នាក់ ពីឧត្តមមន្ត្រីថ្នាក់លេខ៥ មកជាឧត្តមមន្ត្រីថ្នាក់លេខ១ ក្រោមរូបភាព «ករណីពិសេស» ទៅវិញ។
ឯកឧត្តម ឈាង វុន ជាឧត្តមមន្ត្រីឋិតនៅក្នុងក្របខ័ណ្ឌការងារចំនួន២ គឺ៖ ១- ក្របខ័ណ្ឌមន្ត្រីនយោបាយ ជាអ្នកតំណាងរាស្ត្រមណ្ឌលខេត្តបាត់ដំបង និងជាប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភានីតិកាលទី៥ (ហៅកាត់ថា ប្រធានគណៈកម្មការទី៥ នៃរដ្ឋសភា) និង ២- ក្របខ័ណ្ឌមន្ត្រីគ្រប់គ្រងរដ្ឋបាលនៃក្រសួងសេដ្ឋកិច្ច និងហិរញ្ញវត្ថុ មានឋានន្តរស័ក្តិឧត្តមមន្ត្រីថ្នាក់លេខ៥។
យោងតាមសេចក្តីក្រាបបង្គំទូលថ្វាយរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឯកឧត្តម ឈាង វុន ត្រូវបានព្រះករុណាព្រះមហាក្សត្រជាទីសក្ការៈទ្រង់ត្រាស់បង្គាប់ដំឡើងឋានន្តរស័ក្តិពីឧត្តមមន្ត្រីថ្នាក់លេខ៥ មកជាឧត្តមមន្ត្រីថ្នាក់លេខ១ នៃក្របខ័ណ្ឌមន្ត្រីគ្រប់គ្រងរដ្ឋបាលនៅក្រសួងសេដ្ឋកិច្ច និងហិរញ្ញវត្ថុ ដោយព្រះរាជក្រឹត្យលេខនស/រកត/១០១៤/១២៨៣ ចុះថ្ងៃទី២៣ ខែតុលា ឆ្នាំ២០១៤ ក្រោមរូបភាព «ករណីពិសេស» ពោលគឺបានឡើងឋានន្តរស័ក្តិថ្នាក់ឧត្តមមន្ត្រីផ្លោះរំលងចំនួន៤ថ្នាក់។
ដោយឡែក យោងតាមស្មារតីព្រះរាជក្រឹត្យលេខនស/រកត/០២១៥/១២៥ ចុះថ្ងៃទី១៨ ខែកុម្ភៈ ឆ្នាំ២០១៥ ព្រះករុណាព្រះមហាក្សត្រជាទីសក្ការៈទ្រង់បានត្រាស់បង្គាប់ ដាក់ឯកឧត្តម ឈាង វុន ឲ្យចូលនិវត្តន៍ក្នុងឋានន្តរស័ក្តិឧត្តមមន្ត្រីថ្នាក់លេខ១ នៃក្របខ័ណ្ឌមន្ត្រីគ្រប់គ្រងរដ្ឋបាលនៅក្រសួងសេដ្ឋកិច្ច និងហិរញ្ញវត្ថុ ចាប់ពីថ្ងៃទី០១ ខែកុម្ភៈ ឆ្នាំ២០១១ តទៅ ។
មជ្ឈដ្ឋានអ្នកច្បាប់ និងអ្នកតាមដានដំណើរការកំណែទម្រង់រដ្ឋបាលនៅកម្ពុជា បានសម្តែងនូវការរិះគន់ចំនួន២ចំណុច ដូចតទៅ៖ ១- ឯកឧត្តម ឈាង វុន ត្រូវដាក់ឲ្យចូលនិវត្តន៍ក្នុងក្របខ័ណ្ឌមន្ត្រីគ្រប់គ្រងរដ្ឋបាលនៅក្រសួងសេដ្ឋកិច្ច និងហិរញ្ញវត្ថុ ចាប់តាំងពីថ្ងៃទី០១ ខែកុម្ភៈ ឆ្នាំ២០១១ ដោយមានឋានន្តរស័ក្តិឧត្តមមន្ត្រីថ្នាក់លេខ៥នៅឡើយមកម្ល៉េះ បែរជាឯកឧត្តមរូបនេះទទួលបានឱកាសពិសេសឡើងឋានន្តរស័ក្តិជាឧត្តមមន្ត្រីថ្នាក់លេខ១ នៅចុងឆ្នាំ២០១៤ ទៅវិញ? ២- ឯកឧត្តម ឈាង វុន ត្រូវដាក់ឲ្យចូលនិវត្តន៍តាំងពីថ្ងៃទី០១ ខែកុម្ភៈ ឆ្នាំ២០១១ បែរជាទើបចេញព្រះរាជក្រឹត្យនៅដើមឆ្នាំ២០១៥ដាក់ឲ្យឯកឧត្តមរូបនេះចូលនិវត្តន៍ទៅវិញ ដូចទុកឱកាសពិសេសឲ្យឯកឧត្តម ឈាង វុន បានឡើងឋានន្តរស័ក្តិឧត្តមមន្ត្រីថ្នាក់លេខ១ ពោរពេញដោយភាពមិនប្រក្រតីយ៉ាងច្បាស់ក្រឡែត៕
No comments:
Post a Comment