លោកនាយករដ្ឋមន្ត្រី ហ៊ុន សែន បានថ្លែងចំអកឲ្យមន្ត្រីអង្គការសង្គមស៊ីវិលមួយចំនួន ថាមានជំងឺតួឯក ដែលតាំងខ្លួនឯងថាជាមនុស្សសំខាន់ ដែលធ្វើពហិការមិនចូលរួមសិក្ខាសាលាស្ដីពីសេចក្តីព្រាងច្បាប់បោះឆ្នោត និងសេចក្តីព្រាងច្បាប់កែទម្រង់ស្ដីពីការរៀបចំ និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត។
លោក ហ៊ុន សែន មានប្រតិកម្មនៅក្នុងពិធីប្រគល់វិញ្ញាបនបត្រនៅវិទ្យាស្ថានជាតិអប់រំ នៅព្រឹកថ្ងៃទី១០ មីនា ដូច្នេះ ដោយសារតែអង្គការសង្គមស៊ីវិលដែលធ្វើការយ៉ាងសកម្មលើការងារបោះឆ្នោតកន្លងមក មិនចូលរួមក្នុងសិក្ខាសាលាស្ដីពីសេចក្ដីព្រាងច្បាប់ចំនួនពីរ ដែលរៀបចំដោយគណបក្សទាំងពីរកាលពីថ្ងៃទី៩ មីនា នៅវិមានរដ្ឋសភា ដែលរៀបចំឡើងដោយគណបក្សជាប់ឆ្នោតទាំងពីរ។
លោក ហ៊ុន សែន នាយករដ្ឋមន្ត្រី ហ៊ុន សែន អះអាងថា រដ្ឋសភានឹងមិនអញ្ជើញមន្ត្រីអង្គការសង្គមស៊ីវិលចូលរួមក្នុងសិក្ខាសាលា ស្ដីពីសេចក្ដីព្រាងច្បាប់ទាំងពីរនេះទៀតទេ ទោះបីជាមន្ត្រីអង្គការសង្គមស៊ីវិលមួយចំនួននេះ មិនចូលរួមក៏គ្មានបញ្ហាអ្វីដែរ។
លោកនាយករដ្ឋមន្ត្រី ហ៊ុន សែន ព្រមានថា ដំណើរការបោះឆ្នោតនៅពេលខាងមុខ នឹងមិនគាំងទេ បើសិនជាច្បាប់បោះឆ្នោតថ្មីនេះចេញមិនរួច ក៏នៅមានច្បាប់ចាស់ និង គ.ជ.ប ដែលមានជាធរមាន អាចរៀបចំការបោះឆ្នោតបានដែរ ដោយយោងលើកិច្ចព្រមព្រៀងដំណោះស្រាយនយោបាយកាលពីថ្ងៃទី២២ កក្កដា នោះ៖ «ម្សិលមិញសិក្ខាសាលាអំពីច្បាប់បោះឆ្នោតដែលមានការសម្របសម្រួលដោយគណបក្សទាំងពីរ ដោយសារតែលង់ដោយជំងឺតួឯក ហើយមានអង្គការខ្លះគេធ្វើពហិការ ស្មានថាធ្វើពហិការហ្នឹងគេងាប់អី ធ្វើទៅ? ឥឡូវឮថា បើអញ្ជើញលើកក្រោយគេនឹងទៅ គ្មានពេលទេ ទៅឬមិនទៅជារឿងរបស់លោកឯងទេ គ្មាននរណាគេតម្រូវចិត្តរបស់លោកឯងប៉ុន្មាននាក់នោះទេ?»។
ឆ្លើយតបនឹងការលើកឡើងរបស់លោកនាយករដ្ឋមន្ត្រី ហ៊ុន សែន នេះ មន្ត្រីអង្គការសង្គមស៊ីវិល អ្នកវិភាគចាត់ទុកការសិក្ខាសាលាដែលរៀបចំឡើងដោយគណបក្សសង្គ្រោះជាតិ និងគណបក្សប្រជាជនកម្ពុជា នោះ គ្រាន់តែជាល្ខោនឲ្យល្អមើលតែប៉ុណ្ណោះ។ ហើយបញ្ជាក់ថា ពួកគាត់មិនទៅចូលរួមក្នុងសិក្ខាសាលានេះ ដោយសារតែមិនចង់ទៅប្រថាប់ត្រាក្នុងសិក្ខាសាលានេះ។
ប្រធានគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ខុមហ្វ្រែល (Comfrel) លោក គល់ បញ្ញា និងតំណាងសម្ព័ន្ធកំណែទម្រង់ការបោះឆ្នោតអឺរ៉ា (ERA) មានប្រសាសន៍ថា មូលហេតុដែលអង្គការសង្គមស៊ីវិលមួយចំនួនមិនចូលរួមក្នុងសិក្ខាសាលានេះ ដោយសារក្រុមការងារគណបក្សទាំងពីរ មិនបានផ្ដល់របៀបវារៈជាមុន។ លោក គល់ បញ្ញា បានហៅសិក្ខាសាលានេះថា គ្រាន់តែជាការប្រជុំមួយធម្មតាប៉ុណ្ណោះ។
ក្រោយពីក្រុមការងារគណបក្សទាំងពីរ បានធ្វើសិក្ខាសាលាបញ្ចប់កាលពីថ្ងៃទី៩ មីនា នោះ អង្គការសង្គមស៊ីវិលចំនួន ៦០ស្ថាប័ន បានចេញសេចក្ដីថ្លែងការណ៍ និងធ្វើសន្និសីទសារព័ត៌មានរួមគ្នាភ្លាមៗ មិនគាំទ្រសេចក្ដីព្រាងច្បាប់បោះឆ្នោតថ្មី និងសេចក្ដីព្រាងច្បាប់គណៈកម្មាធិការជាតិរៀបចំការបោះឆ្នោតនោះឡើយ ដោយពួកគេសម្ដែងការព្រួយបារម្ភចំពោះដំណើរការរៀបចំសេចក្ដីព្រាងច្បាប់ទាំងពីរនេះ ថាគ្មានគុណភាពច្បាប់ និងការរឹតត្បិតសិទ្ធិសេរីភាពប្រជាពលរដ្ឋ និងសង្គមស៊ីវិល។ល។
អ្នកឃ្លាំមើលផ្នែកអភិវឌ្ឍន៍សង្គម លោកបណ្ឌិត កែម ឡី មានប្រសាសន៍ថា មន្ត្រីអង្គការសង្គមស៊ីវិល មិនចូលរួមក្នុងសិក្ខាសាលានេះជាកាយវិការត្រឹមត្រូវ ព្រោះសិក្ខាសាលានេះជាសិក្ខាសាលាប្រថាប់ត្រា មិនមែនពិគ្រោះយោបល់នោះទេ៖ «រៀបចំឡើងប្រថាប់ត្រាហ្នឹង រំលោភរដ្ឋធម្មនុញ្ញ ខ្ញុំគាំទ្រអង្គការក្រៅរដ្ឋាភិបាលដែលមិនចូលរួមរដ្ឋាភិបាលមិនស្ដាប់ អ៊ិន.ជី.អូ (NGO) ហ្នឹង គឺមិនស្ដាប់យូរមកហើយ តែកន្លែងខ្លះក៏គេទទួលយកទេ មិនសំខាន់ទេ បរិបទនេះប្រជាពលរដ្ឋមានការយល់ដឹងច្រើន»។
មកទល់ពេលនេះ គេមិនទាន់ដឹងនៅឡើយទេថា តើគណបក្សទាំងពីរនឹងរៀបចំសិក្ខាសាលាទៀត ឬយ៉ាងណា? ក្រុមការងារគណបក្សទាំងពីរ ឲ្យដឹងនៅក្នុងសិក្ខាសាលាថា គេទុកឲ្យថ្នាក់ដឹកនាំគណបក្សទាំងពីរជាអ្នកសម្រេច។ ក៏ប៉ុន្តែ លោកនាយករដ្ឋមន្ត្រី ហ៊ុន សែន បានបញ្ចេញសារមិនខ្វល់ពីអង្គការសង្គមស៊ីវិលគាំទ្រច្បាប់នេះ ឬមិនគាំទ្រនោះ ហាក់ដូចជាលោកមិនចង់ឲ្យមានសិក្ខាសាលាបន្តទៀត ព្រោះលោកសំអាងលើ គ.ជ.ប ថ្មី មិនត្រូវបានបង្កើតឡើង ក៏នៅមាន គ.ជ.ប ចាស់ នៅមានជាធរមានដែរ។
ក្រុមមន្ត្រីអង្គការសង្គមស៊ីវិល អះអាងថា ការធ្វើច្បាប់ថ្មីទាំងពីរនេះ គណបក្សជាប់ឆ្នោតទាំងពីរកំពុងបំផ្លាញលទ្ធិប្រជាធិបតេយ្យនៅកម្ពុជា ហើយបើសេចក្ដីព្រាងច្បាប់នេះមិនបានដាក់ឲ្យពិគ្រោះយោបល់ និងទទួលយកអនុសាសន៍យ៉ាងទូលំទូលាយទេនោះ ការបោះឆ្នោតនៅពេលខាងមុខ នៅតែមិនត្រឹមត្រូវ ឯករាជ្យ សេរី និងយុត្តិធម៌នោះឡើយ៕
2 comments:
សុំសួរថាតើ ហ៊ុន សែន ដែលខ្វល់ពីរឿងប្រជាជន
ម្តងណាដែរ ហើយបើវាអញ្ចឺង តើអង្ការទាំងនោះអាយធ្វើអី ហ៊ុន សែន កើតទៅ? ចាំមើលទៅបោះឆ្នោតចប់មិនទាន់ផង គេថា ហ៊ុន សែនឈ្នះទៀតហើយ ចង់អ្នកណាថាអីថាទៅ គឺបានត្រឹមតែថាតែប៉ុណ្ណោះ។
Ah Chor Phnek Muoy Hun Sen Euy !!
Go to hell Ah Roleuy !!
Post a Comment